Diplómanám
Við Myndlistaskólann í Reykjavík eru nú starfræktar 3 námsbrautir á diplómastigi í samvinnu við Tækniskólann - skóla atvinnulífsins.
Námið sem er verktengt hönnunarnám er skipulagt í samstarfi Myndlistaskólans í Reykjavík við Tækniskólann og erlendra háskóla. Í náminu er lögð áhersla á frjótt vinnuferli (vinnuaðferðir/vinnubrögð) og að nýttir séu til hlítar margvíslegir möguleikar í efnum og aðferðum.
Horft er til framtíðar, en aðferðir og hefðir fortíðar hafðar að leiðarljósi. Markmið námsins er að nemendur öðlist þá færni að geta haslað sér völl sem sjálfstæðir hönnuðir og listamenn. Einnig horft til raunhæfra tengsla og tenginga við ýmsar greinar og fyrirtæki og til þess að nemendur afli sér þekkingar á menningar- og viðskiptaumhverfi samtímans.
Námið er byggt upp með hliðsjón af þörfum íslensks samfélags en einnig er litið til nýrra evrópskra reglna um nám og munu nemendur þar af leiðandi geta tengt þau tvö ár sem boðið verður upp á hér á Íslandi við nám annars staðar í álfunni og lokið BA námi við samstarfsskóla. Námsbrautirnar eru þróaðar með styrk frá Leonardo starfsmenntaáætlun Evrópusambandsins.
Fylgjast með þróun námsbrautanna á heimasíðu Leonardo evrópuverkefnisins Knowhow2.
