Ný námsbraut við Myndlistaskólann í Reykjavík, TEXTÍLL, hóf göngu sína haustið 2010. Námið, sem er fullt nám í dagskóla, samanstendur af fjórum sjálfstæðum námshlutum. Í hverjum námshluta: A, B, C og D, sem er ein önn hver, er unnið út frá einni grunnhugsun sem leidd er í margar ólíkar áttir. Við uppbyggingu og þróun námsins í TEXTÍL er m.a. unnið með Steinunni Sigurðardóttur fatahönnuði og háskólum í Noregi, Skotlandi og Danmörku. TEXTÍLL er nám á fimmta stigi samkvæmt EQF-Evrópska viðmiðunarammanum (viðbótareiningar til háskólanáms).

Deildarstjóri Textíldeildarinnar frá hausti 2012 er Andrea Fanney Jónsdóttir textílhönnuður og klæðskerameistari en hún tók við af Hildi Bjarnadóttur myndlistamanni sem vann við stofnsetningu deildarinnar og stýrði, þar til hún tók sér hlé frá störfum til doktorsnáms við List- og hönnunarakademíuna í Bergen.

• Skilning nemenda á uppbyggingu þráðar og mismunandi eiginleikum ýmissa efna, ekki síst ullar.
• Persónulega nálgun og að nemendur geti tjáð sig í vef, prjón, þrykk og í aðrar aðferðir greinarinnar. 
• Færni nemenda í að sjá framleiðslumöguleika, hérlendis og erlendis og í því að fullvinna hugmyndir sínar.
• Eflingu samstarfshæfni og tengslamyndun - bæði innan námsins með hópvinnu og í samstarfi við fyrirtæki og stofnanir.

Í textílnáminu skapast vettvangur þar sem persónuleg sköpun einstaklings er tengd við möguleika stórra og smárra fyrirtækja. Horft er til ríkrar textílsögu Íslands með möguleikum til úrvinnslu. Einnig er horft til þess hráefnis sem landið býr yfir (ull, tilraunir með hör og aðrar jurtatrefjar). Nemendur eru þjálfaðir í að nýta sér framleiðslumöguleika sem byggja á skilningi á efni, aðferðum og þekkingu á alþjóðlegu samhengi iðnaðar og samfélags. Eiginleikar hins smáa samfélags verða nýttir þar sem auðveldlega má mynda ný og áhugaverð tengsl milli ólíkra svæða.